Un Gymru, Sawl Llais

’Un Gymru, Sawl Llais' – DVD i ysgolion ar ddiwallu anghenion disgyblion o gefndiroedd ethnig lleiafrifol yng Nghymru

Mae datgloi potensial pob plentyn wrth wraidd strategaeth Llywodraeth Cynulliad Cymru ar gyfer addysg. Yn ganolog i hyn mae ymrwymiad i wneud Cymru'n wlad sydd ag agwedd gynhwysol tuag at addysg a dysgu. Rydym wedi ymrwymo i sicrhau bod disgyblion o bob cefndir ethnig yn cael cyfle cyfartal i gyflawni eu potensial ym mhob agwedd ar fywyd ysgol.

Mae'r Fframwaith Effeithiolrwydd Ysgolion yn rhoi gwella dysgu a lles plant a phobl ifanc yng nghanol popeth y dylai cymuned addysg Cymru fod yn ei wneud. Mae egwyddor cydraddoldeb yn sail iddo, ac mae'n rhwymo pawb sy'n cymryd rhan yn y system addysg i weithio gyda'i gilydd i sicrhau'r canlyniadau dysgu gorau i bob dysgwr ym mhob sefydliad.

Mae 'Un Gymru, Sawl Llais' yn casglu ynghyd enghreifftiau o arfer da, o ran helpu disgyblion o leiafrifoedd ethnig, o amrywiaeth o sefydliadau ledled Cymru.. Bwriedir iddo gael ei ddefnyddio fel adnodd i ymarferwyr, sy'n cynnwys canllawiau ymarferol i alluogi ysgolion ac awdurdodau lleol i weithredu ffyrdd effeithiol o hyrwyddo safonau uchel ar gyfer darparu addysg i ddisgyblion o leiafrifoedd ethnig mewn ysgolion.

Mae'r DVD yn dangos pa mor broffesiynol ac ymrwymedig yw'r Gwasanaethau Cyrhaeddiad Lleiafrifoedd Ethnig a'u cydweithwyr addysgu ledled Cymru. Rydym yn mawr obeithio y bydd yr adnodd hwn yn ddull gwerthfawr o hybu effeithiolrwydd ysgolion drwy hyfforddiant, datblygu personol a chydweithio â staff arbenigol ac eraill.

Mae'r DVD llawn yn cynnwys y meysydd canlynol: Cyrraedd a Sefydlu; Asesu; Nodi Anghenion Addysgol Arbennig; Cydweithredu; Cymorth Amlieithog; Iaith Gyntaf/Mamiaith; Sefydliadau Cyfrwng Cymraeg, Mentora a Gwrando ar Blant a Phobl Ifanc.

Mae'r DVD llawn yn weddol hir, yn para awr a hanner, ond mae modd dethol 'penawdau' unigol i'w gwylio.