Cyfranogiad mewn gwahanol Gyd-destunau

Mae Llwybrau Dysgu 14-19 yn ymwneud â chyfle cyfartal i bobl ifanc drwy sicrhau bod pob dysgwr yn cael mynediad at brofiadau ehangach. Mae Llywodraeth y Cynulliad wedi ymrwymo i gyrraedd eu nod o sicrhau, erbyn 2015, y bydd 95% o bobl ifanc, erbyn y byddant yn 25 oed, yn barod ar gyfer cyflogaeth grefftus neu addysg uwch.

Bydd y polisi yn helpu i godi cyrhaeddiad addysgol cyn 16 ac ar ôl 16, yn lleihau nifer y bobl ifanc sy’n gadael addysg amser llawn heb ddim cymwysterau; yn gwella cyfran y bobl ifanc 16 oed sy’n mynd i ddysgu pellach neu hyfforddiant seiliedig ar waith; ac yn lleihau nifer yr unigolion 16-18 oed nad ydynt mewn addysg, gwaith na hyfforddiant (NEETS). Bydd yn cyflawni hyn drwy greu llwybrau unigol a fydd yn gydnaws ag anghenion, diddordebau a dyheadau’r dysgwr a drwy ddarparu mynediad at wasanaethau cymorth sy’n eu helpu i oresgyn unrhyw rwystrau rhag cyflawni eu potensial. 

Cefnogir y polisi gan Fesur Dysgu a Sgiliau (Cymru) 2009 sy’n darparu sylfaen statudol ar gyfer cydweithredu rhwng ysgolion a gynhelir a cholegau addysg bellach, ac ar gyfer darparu cyfuniad unigryw o wasanaethau cymorth i ddysgwyr megis Anogwr Dysgu, Cymorth Personol a gwasanaethau arbenigol. Mae gan awdurdodau lleol ddyletswydd statudol i sicrhau bod gan bobl ifanc fynediad at y gwasanaethau hyn, gwasanaethau y gallant helpu pobl ifanc i oresgyn unrhyw rwystrau personol, cymdeithasol, emosiynol neu rwystrau sy’n gysylltiedig â dysgu er mwyn eu galluogi i wneud dewisiadau deallus a’u helpu i barhau i ddysgu.

Mae’r Mesur hefyd yn sicrhau y gall dysgwyr ddewis cwrs astudiaeth o blith dewis eang o opsiynau gan gynnwys cyrsiau galwedigaethol ac academaidd; gweithredwyd hyn o Fedi 2009 ymlaen ar gyfer disgyblion cyn 16 (Cyfnod Allweddol 4). Erbyn 2012, bydd pob disgybl blwyddyn 10 yn gallu dewis o gwrs astudiaeth o gwricwlwm ardal leol, a elwir yn ‘Dewislen’, y mae’n rhaid iddi gynnwys o leiaf 30 o gyrsiau i ddewis ohonynt, gan gynnwys o leiaf 5 cwrs galwedigaethol.

Dolenni:

• Yr Uned Cyfranogiad
• Consortiwm Cyfranogiad
• Cyfranogiad y Cynulliad Cenedlaethol
• Llwybrau Dysgu 14-19