Modiwlau Hyfforddi ar gyfer Arweinwyr Uwch, Llywodraethwyr a Staff

Cyflwyniad i’r pecyn cyfan

Nod y deunyddiau hyfforddi hyn yw helpu uwch-arweinwyr, llywodraethwyr a staff mewn ysgolion yng Nghymru i gael yr wybodaeth, y ddealltwriaeth a’r sgiliau sydd eu hangen i helpu i ddatblygu cyfranogiad effeithiol ymhlith disgyblion. Mae hyn yn gysylltiedig â’r Fframwaith Effeithiolrwydd Ysgolion, gwaith ysgolion o’u gwerthuso eu hunain a Fframwaith Arolygu Cyffredin Estyn.

Mae’r deunyddiau hyn wedi’u treialu’n helaeth ledled Cymru, gan gynnwys mewn lleoliadau hyfforddi athrawon ac ymhlith uwch-arweinwyr a llywodraethwyr.

Trefnir y deunyddiau yn ôl 3 thema â chod lliwiau:

Thema 1: “Beth yw Cyfranogiad Disgyblion?”

Thema 2: “Beth mae Cyfranogiad Disgyblion yn ei olygu mewn gwirionedd?”

Thema 3: “Rhoi Cyfranogiad Disgyblion ar waith ”

Mae nifer o weithgareddau i bob thema, a gyflwynir trwy ddalenni hyfforddwyr ynghyd ag adnoddau ategol i’w paratoi a thaflenni gwybodaeth. Mae sleidiau PowerPoint hefyd yn gysylltiedig â’r gweithgareddau, a rhai ymarferion i helpu’r hyfforddwyr i symbylu’r cyfranogwyr a’u rhannu’n grwpiau.

Mae’r gweithgareddau hyfforddi yn gwbl ddwyieithog, gan ei gwneud yn bosibl i’r hyfforddwyr a’r cyfranogwyr gael gafael ar y deunyddiau yn eu dewis iaith.

Ynghyd â’r pecyn hyfforddi ar gyfer gweithwyr proffesiynol mae Gweithgareddau Pobl Ifanc, y gall disgyblion eu defnyddio i hyfforddi eu cyfoedion neu aelodau o staff mewn elfennau o gyfranogiad disgyblion. Mae clipiau DVD hefyd ar gael, sy’n dangos sut mae disgyblion mewn ysgolion uwchradd yn y De wedi defnyddio’r gweithgareddau i hyrwyddo llais y disgybl. Mae’r dalenni hyfforddi yn yr adnodd hwn ar gael un ai yn Gymraeg neu yn Saesneg, er bod yr adnoddau ategol yn gwbl ddwyieithog.