Newyddion

16.03.2010

Disgyblion Yng Nghymru Wedi Cael Llais Newydd

Mae un o Chwaraewyr Pêl-droed Dinas Caerdydd, Joe Ledley, wedi rhoi ei gefnogaeth i ddigwyddiad i lansio gwefan newydd o'r enw 'Llais Disgyblion Cymru' i blant, pobl ifanc ac oedolion mewn sefydliadau addysgol yng Nghymru.

Gall plant, pobl ifanc a staff ddefnyddio gwefan 'Cyrraedd y Nod', sy'n cael ei hariannu gan Lywodraeth Cynulliad Cymru gyda chymorth Cronfa Gymdeithasol Ewrop, i rannu gwybodaeth, gwneud sylwadau, gofyn cwestiynau a chyhoeddi astudiaethau achos ynglŷn â’r rhan y maent yn ei chwarae yn y penderfyniadau sy’n effeithio arnynt mewn sefydliadau dysgu ledled Cymru.

Mae cystadleuaeth clip fideo, ‘Eich Dyfodol, Eich Dyumuniad’, hefyd wedi'i chyhoeddi ar y wefan heddiw [dydd Mawrth 9 Mawrth 2010], ac mae’n agored i bob plentyn a pherson ifanc 3 – 18 oed ledled Cymru.

Meddai Joe Ledley: "Fe all pobl ifanc ddefnyddio technoleg a rhyngweithio â hi mewn ffyrdd na allen ni eu dychmygu ychydig flynyddoedd yn ôl.

"Mae cymryd rhan mewn gwefannau diogel fel hon, sy’n cael ei rheoli, yn gallu bod yn llawer o sbort ac yn ffordd wych o ddysgu sgiliau TG newydd.

"Mae hefyd yn bwysig iawn i bobl ifanc leisio'u barn a dysgu'n gynnar eu bod nhw'n gallu gwneud gwahaniaeth drwy gymryd rhan a chyfrannu mewn ffyrdd gwahanol – er enghraifft, drwy gynghorau ysgolion, eco-grwpiau, ysgolion iach a fforymau ieuenctid."

Bu’r Dirprwy Weinidog, Huw Lewis, a Chomisiynydd Plant Cymru, Keith Towler, yn siarad â disgyblion yn Ysgol Gynradd Kitchener yng Nghaerdydd yn y digwyddiad i lansio'r wefan a'r gystadleuaeth.

Meddai Huw Lewis: "Mae technoleg wedi'i chwyldroi yn ystod y deng mlynedd diwethaf. Rydyn ni'n gwybod bod cyfathrebu mewn ffyrdd cyflym, difyr a rhyngweithiol yn ail natur - yn enwedig i'n plant a'n pobl ifanc.

"Drwy lansio'r wefan hon, rydyn ni am annog rhagor o blant a phobl ifanc i gymryd rhan yn y gwaith o wneud penderfyniadau a rhannu arferion da - ac i gael hwyl wrth wneud hynny!

"Rydyn ni'n gweld y wefan hon fel cymuned fywiog a deniadol y gall pobl gymryd rhan ynddi, lle gall plant, pobl ifanc ac oedolion rannu syniadau ac enghreifftiau o sut y gallwn ni ddatblygu cymunedau ysgol mwy effeithiol sy'n gwrando, ac sy'n diwallu anghenion pawb."

Meddai Keith Towler: "Mae cyfranogiad disgyblion wedi cynyddu'n sylweddol mewn ysgolion ledled Cymru yn ystod y saith mlynedd diwethaf, ac mae Estyn wedi cydnabod bod hyn yn rhan hanfodol o addysg.

"Mae pob ysgol a phob plentyn yn wahanol, a bydd y dulliau a gaiff eu defnyddio i ennyn diddordeb plant a'u hannog i gymryd rhan yn wahanol. Dw i'n gobeithio y bydd y wefan newydd hon yn galluogi mwy o blant a phobl ifanc i gymryd rhan ym mhob agwedd ar fywyd ysgol sy'n effeithio arnyn nhw, ac y bydd hefyd yn galluogi'r gweithwyr proffesiynol sy'n gweithio gyda nhw i rannu arferion gorau fel bod cyfranogiad plant yn cael ei gryfhau ledled Cymru.”

Mae Llais Disgyblion Cymru yn disodli gwefan Cynghorau Ysgolion Cymru a gafodd ei lansio yn 2006. Yn 2008, comisiynodd Llywodraeth Cynulliad Cymru waith ymchwil i gael adborth ar y wefan drwy ymgynghori â phlant, pobl ifanc a gweithwyr proffesiynol.

O ganlyniad i'r adborth, mae'r wefan newydd yn anelu at fod:

• yn fwy rhyngweithiol gyda fforymau, ystafelloedd sgwrsio a thudalennau i aelodau
• yn fwy lliwgar a difyr
• yn fwy eglur ac yn haws i’w defnyddio
• wedi'i theilwra at ddisgyblion o wahanol oedrannau
• yn llai o ran ei chynnwys – ond yn canolbwyntio ar annog ysgolion cyfan i gymryd rhan – yn hytrach na chynghorau ysgolion yn unig.

Bydd y gystadleuaeth a gafodd ei chyhoeddi heddiw yn agored i ddisgyblion o oedran ysgol gynradd ac uwchradd. Bydd pedwar enillydd rhanbarthol ym mhob un o'r ddau gategori ledled Cymru.