Amdanon ni

 

Mae Llywodraeth Cynulliad Cymru (LlCC) yn credu bod gan bob plentyn a pherson ifanc yr hawl i fod yn ddiogel, yn hapus ac yn iach ac i ddatblygu eu sgiliau a’u potensial drwy gyfrwng addysg. Er mwyn dangos ein bod o ddifri ynglŷn â hyn, rydym wedi llofnodi rhywbeth o’r enw Confensiwn y Cenhedloedd Unedig ar Hawliau’r Plentyn (y Confensiwn). Mae un o’r hawliau yma ("Erthygl 12") yn dweud y dylai plant a phobl ifanc gael dweud eu dweud pan fydd pobl yn gwneud penderfyniadau sy’n effeithio arnynt.

Mae’r tîm cyfranogiad disgyblion yn LlCC yn gweithio i gefnogi dy lais di yn yr ysgol drwy gynnig gwefan sy’n ddefnyddiol, yn gymdeithasol, yn hwyliog ac yn ddifyr. Nod y safle yw rhoi’r wybodaeth a’r deunyddiau y bydd arnat eu hangen i wneud y gorau o gyfleoedd i chwarae rhan fwy gweithgar yn dy ysgol. Rydyn ni’n gobeithio y bydd hyn yn help iti weithio gydag oedolion i wneud dy ysgol di’n lle gwell.

Yn yr adran hon o’r wefan galli di ddysgu mwy am y Confensiwn, beth yw cyfranogiad plant a phobl ifanc, pam mae’n beth da i’w ddatblygu, a beth sy’n digwydd yng Nghymru i dy gefnogi di i allu lleisio dy farn yn yr ysgol.

Er mwyn rhoi gwybod i ni pa bethau sy’n digwydd yn eich ysgol chi i sicrhau bod plant yn cael cyfle i chwarae rhan yn y broses o wneud penderfyniadau, rhaid anfon astudiaethau achos i: childrenandyoungpeoplesrights@wales.gsi.gov.uk

Joia!